احوالات رهب

احوالات راهب
كيمسن اي باش معجز عيساني گوستردين منه
قانلي صورتله بوگون معناني گوستردين منه

بير دانیش منله ندن منحور اولوبدور حنجرین
ياره لي باش باشيوه قوربان هاني بس پيكرین
نيزه لر اوسته سنيلن همسفردور لشگرین
جلوه عشقینده سن يحياني گوستردين منه

كيمسن اي باش نيزه اوسته اهل عشقه راه سن
آسمان عشقيده قانه بويانمش ماه سن
کیمدی بو قاره گینلر اونلارا همراه سن
ياندي قلبيم خرداجا طفلاني گوستردين منه

كيمسن اي مظلوم اولن قانلي باشین اعجاز ائدیر
جلوه ائيلیر نيزده عشاقه كشف راز ائدیر
سنله هر کیم همسفردور عرش و فرشه ناز ائدیر
وصل ياره چاتماقا ميزاني گوستردين منه

بیر دانیش منله ائدیر هر قلبی روشن سوزلرین
آيه آيه ائیلیري قراني معني گوزلرین
باش كسن قومه اسير اولموش ندن گل اوزلرین
تا بيليم كيمسن بئله دوراني گوستردين منه

درك ائده بیلمز جلال و شوكتين هر بير گورن
سن کلیمه طور سیناده گورنموش جلوه سن
ائتمدون نفرين بو بد طينت لره آيا ندن
سري وار بو رحمت شاياني گوستردين منه

كشتي عشقین مني چكدي بلادن ساحله
آزدي ويرسه م باشيمي عشقین بهاسينده صله
ايندي فردوس برين حسرت چكیر بو منزله
رمز و راز عالم امكاني گوستردين منه

خواب غفلتدن اويانديم لطفويله من بئله
راضی اولسا گر حرملر ائتمسه سندن گله
ساخلارام باشین قوناق تا دوشمه سین الدن اله
ابتدای راهیده پایانی گوستردین منه

من باش اگديم باشيوه سندن اطاعت ائيلرم
دينیوي ائتديم قبول حقه شهادت ائيلرم
هم سنه هم اهلبيته قالسا خدمت ائيلرم
گول یوزونده جنت الاعلانی گوستردين منه

نه يوزيله محشره آيا گلر بس امتین
دينیني دنيايه ساتدي بيلمدي اوز قيمتین
باشيوي تشنه كسيب آواره ائتدی عترتین
ظلم و جور امت ناداني گوستردين منه

گر بیزه قالسیدی عیسی نبی دن یادگار
ساخلیاردوخ گوزلر اوسته با کمال افتخار
اولدوروب پیغمبرین اوغولون بو امت آشکار
قدرت سيم و زر و دنياني گوستردين منه

مرهميم ده اولماسا سيللم جمالیندن قاني
اولميوب هيچ يئرده گويا استراحت امكاني
قال بو منزلده منه مهمان سنی عيسا جاني
عاشق ائتدین بير باخيشدا جاني گوستردين منه

قويسالا هر نه واريم وئره م سني تا ساخليام
هر گئجه شام عزا قوررام دويونجا آغليام
گر چه سايسيزدي ياران امكاني یوخدی باغليام
زخم عشقه مرهم و درماني گوستردين منه

كاش اوليديم سنله اي شه كربلاي عشقده
بذل ائديدیم جانيمي منده مناي عشقده
باش و جان لازم دگیل الا هواي عشقده
بزم انس و خلوت جاناني گوستردين منه

بو گئجه سنلن تاپیبدي منزليم عالي صفا
شكري وار چوخ چوخ کی من اولدوم سنيلن آشنا
سن آنان جاني منه قول شفاعت وئر آقا
اختيار عالم امكاني گوستردين منه
******************
راهبی گوردی تحیرده امام عالمین
نطقه گلدی تا الین دوتسون اونون حبل المتین
من شهنشاه حجازم زاده زهرا حسین
عشقوین وار هر قدر امکانی گوستردین منه

سن مني راهب بلايه توش اولانلاردان سوروش
کربلادن باغری قانیله دولانلادان سوروش
گل یوزی دوشمن جفاسیندن سولانلاردان سوروش
سن بوگون قلبینده کی ایمانی گوستردین منه

https://t.me/joinchat/AAAAAEIwDKalN1ZV3TZtxw

التماس دعا