حضرت زینب س

زبانحال حضرت زینب س

گل باجین ترک ائله ییر غصه لی دونیانی حسین
دینئجه لیر ظلم و جفادن يورولان جانی حسین

تئز یئتیر شامه اوزون جان وئریر م حسرتیله
گوزلریم آختاریری سن کیمی جانانی حسین

بیر کسیم یوخ دی بو غربتده منه مونس اولا
اولورم ائیله خبر عترت طاهانی حسین

نه باجیم وار باشیم اوسته نه ده قارداش نه آنا
کیمسه یوخ باغلیا بو دیده گریانی حسین

باجیوین مونسی غربتده فقط گوز یاشی دی
توکولور گور نئجه هجرینده اورک قانی حسین

عشقیوه سینه ده یئر وئردیم ازلدن قارداش
خوشلادیم عشقویله هر غم عظمانی حسین

دلخوشام قانلی قیامینده سنه یولداشیدیم
ایکیمیز حفظ ائله دیک صحنه ده قرآنی حسین

حقین اثباتینه هر یئرده چالیشدیم قارداش
دانیشیب خوار ائله دیم فرقه دونانی حسین

کربلا جلوه آیات خدایی دی ولی
یانارام یادیمه سالدیقجا قضایانی حسین

ائل لریم باتدی قانا ظلمیله خیمه م یاندی

بحر غم جوشدی ائدیب روحیمی طوفانی حسین

اولمادی دادرسیم کسدیله حق اوسته باشین
هاردا لب تشنه کسللر بئله قربانی حسین

باشیوین عشقی منیم سالدی بلایه باشیمی
گزدیم آردینجا سنین کوه و بیابانی حسین

کوفه ده قانلی باشین ائله دی پیشواز منی
سایه سالدی باشیما جلوه ربانی حسین

نه اولارشامل اولا مرحمتون بیرده منه
درک ائله صون نفسیمده من نالانی حسین

غصه لر سالدی ایاقدان منی امدادیمه گل

ائیله ییب آیریلیقین روحومی زندانی حسین

شام ده شامه دونوب زینبیوین قاره گونی
گل گتیر شامه اوزون روضه رضوانی حسین

تا نفس وار گوزل آدین دلیمین ازبریدی
عشقی تکمیل ائله دیم قالمیا نقصانی حسین

آلیرام عطریوی بو قانه باتان کوینک دن
سالیرام یادیمه اوچ شعبه لی پیکانی حسین

داغلاییر سینه می هرآن سینه وین اوخ یاراسی
اولمادی هیچ یاراسین باغلاماق امکانی حسین

ممکنیم اولمادی دفن ائیلماقا پیکریوی
کربلا دشتینه تاپشیردیم او اعضانی حسین

قولومی باغلادی دشمن سنین عشقینله منیم

تا کی عالم بئله بو عهدیله پیمانی حسین

غم هجرونده یانیب دوندی کوله خسته گوگل

سوندوره بیلمه میشم بو دل سوزانی حسین

نئچه مدت دی بو آرزیمدی چیخان وقته جانیم
سن تلاوت ائده سن صوتیله قرآنی حسین

نه اولار شامه گلیب شاد ائده سن زینبیوی
چاره سیز دردلرین سنده دي درماني حسین

اولمادی کرب و بلا زینبیوه مدفن اگر
گل منه تحفه گتیر تربت اعلانی حسین

گوزلریم یولدا قالیب هارداسان ای روح و روان
گور نئجه عرشه چیخیر زینبین افغانی حسین

گل اوزون قبریمی قاز دفن ائله عزتله منی
گل دریغ ائیلمه حقیمده بو احسانی حسین

هوشمندین اوره گی یازدیقیجا قان اولدی
وار یئری آغلادا بو غم هامی دنیانی حسین

https://t.me/Mohamadhooshmand

برچسبها: حضرت زینب س