درباره سایت
آخرین مطالب
امکانات وب
آلعبا مرامینه چاتدی قیامیدن
مٌحرم اولوبلا کعبه آماله شامیدن
شامل اولوبدی زینبه حقین عنایتی
سیندیردی کاخ ظلمی اونون صبر و همتی
فتح ائیلییب اورکلری قولباغلی قهرمان
یول سالدی کوی عشقه طرف غملی کاروان
مژده گتیردی باد صبا وصل یاریدن
صبر و توان آپاردی دل بیقراریدن
هرکس گزیردی قلبیده کی دردینه دوا
آلمیشدی اختیاریلرین شوق کربلا
تعجیلیله گئدیردیله دیل داغلی گوزده اشک
سوغات قانلی کوینگیه بیرده پاره مشک
آلمیشدی شوق وصل هامیدان طاقت و توان
بیرمنظره گوروندی چیخیب گویلره فغان
یول اوسته گوردولر کی آخیر چوللره فرات
گلدیقجا موجه اود سالیری دیللره فرات
آخدیقجا سو ائدیردی دل زینبی کباب
نهر فراته دوتدی یوزون ائیلدی خطاب
ای سو ندن بو نوعی گلیب سن تلاطمه
سندن اورک یارالیدی اولاد فاطمه
اولدی بیزه اولان آخاجاقسان نقدری آخ
محنت اسیری اصغر آناسی ربابه باخ
سو اولمادي آنا بالادان اولدي شرمسار
سو اوسته صودامر بالاسین ائتدیلر شکار
اوخ گر چي اصغری قوتاریب راحت ائیله دی
اما ربابین آرزيلارین غارت ائیله دی
علت ندور كي گوز داغي وئردین قوناقلارا
قسمت ندن دی اولمادین عطشان دوداقلارا
عباسیمی خجالت ائدوبسن رقیه دن
قان ائیلدین اورکلری قان اولمادون ندن
ائتدی فراته شکوه گوزی دولدی اشکیله
عباسینی خیاله سالوب پاره مشکیله
باخدوقجا قتلگاهه خانیم اولدی باغریقان
گویا قیتدی قرخ گونی بیر لحظه ده زامان
یاده سالیب نه نوعیله جان وئردی قارداشی
آخدی عذاره سیل کیمی قانلی گوزیاشی
باخدوقجا نینوا چولونه آرتدی محنتی
سالدی خیاله منظره قتل و غارتی
دوشدوقجا یاده حادثه لر آلدی صبرینی
گوزیاشلی آختاریردی او ششگوشه قبرینی
هر کس گزیردی یوسیفینی قعر چاهیده
قالمیشدی زینبین اورگی قتلگاهیده
تا گلدیلر او مهر هدائت باتان يئره
حجاج گلدي قبله عالم ياتان يئره
تا جلوه لندی گوزلره آمال کعبه سی
اوج ائتد ی آسمانه طرف وا حسین سسی
وصل عالمینده یاری تاپان بیلمدی اوزون
شرح فراقه تاپمادی سوز دولدوورب گوزون
زینب ده قبری گوردي چاتيب آرزوسينه
اول سلام ائديب حرم مشكبوسينه
گلدي بيانه بلبل غم شرح حال ایدوب
اوچ شعبه اوخ یاراسینی اول سوال ایدوب
ای دین حق یولوندا ذبیحا من القفا
یاتما ایاقه دور منه خوش گلدین ائت اخا
هر چند کی چوخ اینجیمیشم ائتمرم گله
سالدی فلک آرامیزا بیر عومر فاصله
هيچ بير ديونجا من سنه بير آغليانماديم
عفو ائت يارالي ياره لرين باغليانماديم
قرخ گوندی آیریلقدان حسین جانه گلمیشم
سینم دولوبدی دردیله درمانه گلمیشم
وئر اذن تا سنه دانیشیم انقلابیدن
هم کوفه دن دیوم همی شام خرابیدن
قران یولوندا بذل ائلدین باش و جانیوی
وئردون رضای حقیده خوش امتحانیوی
منده تلاش ائدیب هدفین زنده ائیلدیم
ظلم اهلینی همیشه سرافکنده ائیلدیم
آهیمله فتح ائیلمیشم شامی چیخمیشام
کفر و ستم بناسینی گوز یاشلی ییخمیشام
تضمین ائدم بو قانلی قیامین بقاسینی
من باشلادیم خرابه ده هیئت اساسینی
"درديم چوخ اولدي شاميده درمان تاپولمادي"
همدرد اولا بيزيله بير انسان تاپولمادي
اُولدي بالام جنازه سينه اولمادي كفن
اوز کوينگيله دفن ائیله دیم محنتيله من
نسگل لرين اورك باشينا يازديم آغلاديم
ويرانسراده قبرين اوزوم قازديم آغلاديم
بیلمم نقدری شکر ائیلیم حی داوره
زوار ایدوب بو گون منی بو با صفا یئره
قورتارمياندي گرچي منيم درد و محنتيم
ايكاش بو مزارون اولا بيرده قسمتيم
برچسبها: حضرت امام حسین ع