زبانحال حضرت زینب و کوفه

زبانحال کوفه

او دم کی کوفه ده گوردی حسینینین باشینی
مخاطب ائتدی بو نوعی یارالی قارداشینی

امان بو کوفه ده بیعت شکن جماعتدن
دولوب اورکلری قورتارمیان عداوتدن

دئیوله خارجی پیغمبرین بالالارینا
دونوبدی قانه اورک طعنه و شمادتدن

اسیر دوشمنم اما کیچیلمرم بیرینه
اوزاقدی هاشمیان هر زماندا ذلتدن

قولومی باغلیا بیلمزله اولماسا عشقین
گلم دالینجا مقرر اولوب مشیت دن

زیادین اوغلینی من همتیله خوار ائده رم
گرک نتیجه آلاخ بیز بو قانلی نهضتدن

مجال یوخ دانیشام من سنه اورک سوزونی
دییم کئچن گئجه باشه گلن حکائتدن

تاپانمادیم سنی صبحه قدر داریخیدیم حسین
قورتاردی صبریمی هجرین سالیب دی طاقتدن

جداده سن اوخی قرآن حیات وئر باجیوا
دانیش منیله قوتار بو غریبی غربتدن

یانیم بو غمده و یا اهل کوفه نین حالینا
ندن یاتوبلا آییلمیللا خواب غفلتدن

بو صحنه نی باجین اولسون حسین اینانمازدیم
باشیوا داش آتیری اهل کین عداوت دن

بو داش ورانلار امان ویرسه لر اگر بیر آن
دوشردی اوز گوزووین یاره سی اذیتدن

کئچن کئجه باجین اولسون کیمه قوناقیدون
کی یوخدی بهره سی انصافیدن مروت دن

هایاندا آچمیشیدی میزبان یاتان یریوی
حکائتی اوخونیر یوزدکی علامتدن

وروبلا باشیوه داش تازه دن آخیر قانی
همیشه یانمالیام سوز ظلم و محنتدن

الیم چاتییدی قویاردیم اوزوم دوا باشیوا
یواردیم اشگیمیله قانی توزلی صورتدن

هایاندا قالمیشیدون زینبیبن دوتولموش آیی
نه تئز غروب ائیله دین دوشدون استقامتدن

رقیه دن نگران اولما تاپشیر اللهه
مواظبم منه تاپشیردیقین امانتدن

ولیک قالمادی صبری بونی دانشدیر حسین
کی آز قالیر دایانا قلبی سوز فرقتدن

بو شهرین اهلی منی چوخلاری تانیر اما
هامی غریبه اولوب یوخ تانیش جماعتدن

محبتیله گلنلرده زینبی تانیمیر
زمانه قامتیمی بوکدی بار محنتدن

تعارف ائیلیری اطفاله اوز تصدقنی
بو کوفه اهلی مني یاندیرور بو الفتدن

یازوبدی طبعی قدر هوشمند بو شعری
اونی انوتما قیامت گونی شفاعتدن
هوشمند