عید فطر

اروجلوق بایرامی گلدی ای اهل رحمت و غفران

ملک لر دعوت حقی بشارتله ائدور اعلان

گلین ای بنده لر درگاه حقدن ایستیون حاجت

اولوب حق اهلینه شامل بو گونده رحمت شایان

قوشولدوق بيزده ابراره کرم درگاهینه گتدوق

اولا مين شكر توفيق عبادت ائيلدي احسان

اگر چی هئچ عبادت شانینه لایق اولا بیلمز

قبول ائیلر یقین اوز بنده سیندن ایزد منان

بیر آی حقه قوناق اولدوق اطاعت ائیلدوک امرین

بیر آی اولدوق کرامت سفره سینده خالقه مهمان

بو درگهده قوناقیله قوناقه فرق قویمازلار

آچیقدی سفره گل ادارکیوه وسعت وئر ای انسان

گتورمز بنده نین عیبین اوزه ستار و رحماندور

باغشلار هر نقدر اولسا گناهی قادر سبحان

نه ایستیرسن گل ایسته خرمن غفران و رحمتدی

بیره مین اجریوی وئرسین بو گونده صاحب قرآن

بو گون بایرامدی ایسته عافیت دنیا و عقبایه

بیزی اطهاره قوشسون پاک قیلسین خالق یزدان

سنی وئرم قسم یا رب بحق مرتضی حیدر

اماندی واگذار ائتمه منی اوز باشیمه بیر آن

بحق حضرت زهرا ترحم ائیله "مدهوشه"

اگر چه دولدوروبدی نامه اعمالینی عصیان